Komuna e Prizrenit ndan buxhet për Kalanë e Korishës pas ekspeditës së arkeologëve

4 Nëntor 2016 - 08:33      

Prizren, 4 nëntor - Qeveria Komunale e Prizrenit ka ndarë afër 20 mijë euro për projektin e konservimit dhe gërmimeve arkeologjike në Kalanë e Korishës. Shumë të përafërt të mjeteve për të njëjtin projekt ka zotuar edhe Instituti Arkeologjik i Kosovës. Të dyja këto institucione kanë një memorandum bashkëpunimi në këtë drejtim, të nënshkruar kohë më parë.

Gjatë verës në këtë lokalitet, sipas përgjegjësve për trashëgiminë kulturore, është realizuar një ekspeditë e gërmimeve arkeologjike dhe e konservimit. Por autoritetet komunale të Prizrenit tek në fillim të nëntorit kanë marrë vendim për ndarjen e mjeteve, me ç’rast kanë vlerësuar se në bazë të gjetjeve të deritanishme bëhet fjalë për një kompleks të rëndësishëm arkeologjik.

Në anën jugore të fshatit Korishë, në lartësinë mbidetare 728 metra, gjenden gërmadhat e Kalasë së Korishës. Gërmimet e para arkeologjike janë bërë në vitin 2002, me ç’rast është zbuluar kisha e periudhës paleokristiane. Kalaja është ndërtuar në periudhën e antikitetit të vonë respektivisht në shek. V-VI, që e vërtetojnë edhe gërmimet e bëra në vitet 2002-2007 (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.