“Pasardhësi” i Kadaresë, shfaqja e radhës në TKK

26 Tetor 2016 - 10:36      

“Pasardhësi” i Ismail Kadaresë, me një nëntor do të nisë të marrë “frymë” në Teatrin Kombëtar të Kosovës. Kjo shfaqje do të inskenohet nën regjinë e maqedonasit Slobodan Unkovski, i cilësuar si regjisori më i mirë i Ballkanit.

Vepra e shkrimtarit të njohur shqiptar e botuar në vitin 2004, sjell në kujtesë historinë e Shqipërisë, historinë e re, kujtesën për një të shkuar të afërme, shkruan KultPlus. Tashmë mbetet të shihen ndryshimet që do t’i bëjë regjisori sa i përket dramaturgjisë.

“Pasardhësi”, është premiera e pestë dhe e fundit sa i përket këtij viti në Teatrin Kombëtar të Kosovës.

Rikujtojmë se përveç dramave shqiptare që kanë dominuar dukshëm në këtë institucion, së fundmi është dhënë edhe premiera “Tregtari i Venedikut”, nga William Shakespeare me regji të Mettheë Lenton. Ndërkaq Teatri Kombëtar i Kosovës, me shfaqjen “Eshtrat që vijnë vonë”,me tekst të Teki Dervishit e regji nga Martin Kocovski, mori çmimin “Grand Prix”, në Bukuresht.