Thaçi: Ta mbështesim filmin “Home Sweet Home” në rrugëtimin drejt OSCAR-it

24 Tetor 2016 - 14:02      

Prishtinë, 24 tetor 2016 – Presidenti i Republikës së Kosovës, Hashim Thaçi, ka pritur sot ekipin e filmit “Home Sweet Home”, i cili do ta përfaqësojë Kosovën si propozim zyrtar në kategorinë “Filmi më i mirë i huaj”, në Akademinë e çmimeve “Oscar”, bëhet e ditur përmes një komunikate për media.

Për realizimin e këtij filmi, Thaçi ka përgëzuar regjisorin Faton Bajraktari, producentin Trim Musliu, skenaristin Zymber Kelmendi dhe drejtorin e Qendrës Kinematografike të Kosovës (QKK), Arben Zharku.

“Kosova ka shumë histori dhe rrëfime që mund të përdorën për të prodhuar filma të mirë. Filma të tillë forcojnë identitetit kulturor, por edhe shtetëror të Kosovës”, ka theksuar Thaçi.

Ai ka siguruar ekipin e filmit se do të bëjë çmos që të mbështesë këtë film në rrugëtimin drejt ceremonisë së ndarjes së çmimeve më prestigjioze në kinematografinë botërore, “Oscars”, transmeton Koha.net.

Kreu i vendit është shprehur i sigurt se institucionet e Kosovës do ta mbështesin këtë film edhe me mjete financiare, për të siguruar depërtimin e filmit në botë.

Nga ana tjetër, regjisori Faton Bajraktari ka theksuar se filmi tashmë është shfaqur nëpër shumë festivale me renome ndërkombëtare.

Edhe drejtori i QKK-së, Arben Zharku, ka theksuar se për ta siguruar pjesëmarrjen e këtij filmi në “Oscars” nevojitet një mbështetje më e madhe nga institucionet e Kosovës.

“Home Sweet Home” do të nisë rrugëtimin drejt OSCAR-it në fillim të muajit nëntor, në Los Angeles të SHBA-së.

© KOHA. Të gjitha të drejtat janë të rezervuara.