Promovohet libri “Duke shëruar plagët e luftës” [video]

22 Tetor 2016 - 19:24      

“Rexhep Shala nga Mushtishti, me plagë në ijën e majtë. Afrim Veselaj nga Reqani me plagë në vetullën e djathtë ku duket copë metalike e ngulitur në kockë. Nazmi Veselaj nga Reqani, me plagë në supin e djathtë dhe mbi veshin e djathtë. Musë Loshi nga Vraniqi, me plagë në kofshën e majtë. Afrim Krasniqi, nga Bukoshi me plagë në kofshën e majtë”.

Kështu kishte shkruar doktori Ibish Ahmeti në ditarin e tij të luftës, 17 vjet më parë, në faqet e 6 majit të vitit 1999, raporton KTV.

Për rreth një vit, pediatri nga Maqiteva e Suharekës, Ibush Ahmeti, kishte shërbyer si mjek në Spitalin Ushtarak të Batalionit II, Brigada 123 në Budakovë të Suharekës.

Të paktën që nga 19 prilli, e deri më 13 qershor 1999, Ahmeti kishte mbajtur rregullisht ditar, të cilit ai ia ka bashkangjitur edhe kujtimet e tij, për ta botuar si libër më vete.

Në faqet e këtij libri, duke shfrytëzuar edhe protokollet e pacientëve, autori ka sjellë histori dhe të dhëna nga koha e luftës, kur ai kishte mjekuar rreth 100 të plagosur si dhe mijëra të sëmurë.

Ditari “Duke shëruar plagët e luftës”, është cilësuar si dëshmi historike dhe si një nga rrëfimet më autentike për kohën e luftës së viteve 1997-1999 në Kosovë. 

© KOHA. Të gjitha të drejtat janë të rezervuara.

Promovohet libri “Duke shëruar plagët e luftës” by kohanet