Nis festa tradicionale rinore ”Festari 2016”

28 Shtator 2016 - 13:19      

Suharekë, 28 shtator- Festa tradicionale e rinisë dhe e qytetarëve të Komunës së Suharekës “Festari 2016”, e cila prej pesëmbëdhjetë vjetësh organizohet çdo herë në fund të shtatorit, ka nisur të martën me aktivitete të ndryshme, shkruan sot Koha Ditore.

Hapjen solemne të kësaj feste në emër të kryetarit të Komunës së Suharekës, Sali Asllanaj, nën patronazhin e të cilit po mbahet ajo, e ka bërë drejtori i Kulturës, Rinisë, Sportit dhe Mërgatës, Nuhi Llugaxhiu. Gjatë ditës do të ketë edhe aktivitete të tjera, si: kolonia e artistëve të ardhur nga vende të ndryshme, të cilët do të punojnë gjatë tërë javës sa do të zgjasë “Festari...”, dhurimi i veshmbathjeve dhe i gjërave ushqimore në qendrën rinore “Shtëpia e Felbachut”.

Ndërkaq në orët e mbrëmjes të së martës është mbajtur koncerti për të rinj në sheshin “Fadil Vata”, ndërsa në orën 19:00 është bërë hapja e ekspozitës personale e skulptorit nga Shqipëria, Besmir Gjoka.

© KOHA. Të gjitha të drejtat janë të rezervuara.