Një dekadë për themelimin e Inspektoratit të trashëgimisë kulturore

22 Shtator 2016 - 09:33      

Prishtinë, 22 shtator - Plot 10 vjet pas miratimit të Ligjit për trashëgimi kulturore, Ministrisë së Kulturës i ka rënë ndërmend se nuk është duke e respektuar atë, shkruan sot Koha Ditore.

Tash e një dekadë institucioni më i lartë kulturor nuk ia ka dalë të themelojë Inspektoratin e trashëgimisë kulturore. Të mërkurën MKRS-ja nëpërmjet një shkrese i është drejtuar Ministrisë së Financave që t’i lejohen pesë vende të reja pune, edhe pse në listat e pagave figurojnë pesë paga për Inspektoratin.

MKRS-ja planifikon që të ketë tre inspektorë, një kryeinspektor dhe një asistent administrativ. Kësisoj MKRS-ja planifikon që nëpërmjet tre inspektorëve të kontrollojë gjendjen e trashëgimisë kulturore në vend.

“E kemi dërguar sot kërkesën në Ministrinë e Financave. Pas aprovimit do të hapet konkursi”, ka thënë të mërkurën ministri i Kulturës, Kujtim Shala, të cilit i është dashur më shumë se një vit e gjysmë mandat që të vendosë për themelimin e Inspektoratit që përcaktohet me ligj (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.