Amerika fton artistët nga Kosova e Shqipëria për rezidenca artistike

22 Shtator 2016 - 09:31      

ArtsLink Residencies fton artistët nga Kosova dhe disa shtete tjera të botës të aplikojnë për rezidenca artistike në Shtetet e Bashkuara të Amerikës.

ArtsLink Residencies, siç transmeton KultPlus, fton shkrimtarët, ata që merren me arte performuese, artistët e arteve vizuale dhe artistët e fushave tjera të aplikojnë për rezidencë deri me 15 tetor.

Artistët më pas do të mirëpriten nga organizata kulturore nga të gjitha shtetet në Amerikë, dhe do ti akomodojnë artistët në bazë të rregullave të tyre. Artistët nga Shqipëria, Rusia, Serbia, Sllovenia, Ukraina, Uzbekistani, Estonia, Hungaria mund të aplikojnë për rezidencë.

Qëllimi i rezidencave mbetet krijimi i kontakteve me organizata kulturore në Amerikë dhe me individë që më pas mund të luajnë rol në zhvillimin e artistëve. Ato paguajnë për shpenzimet e artistëve gjatë qëndrimit në Amerikë.

Rezidencat fillojnë vitin tjetër ndërsa artistët duhet të jenë të dëshmuar në vendet prej nga vijnë për të qenë fitues të rezidencave. Rezidencat zgjasin pesë ose gjashtë javë.
Doruntina Basha ka qenë pjesëmarrëse në këtë rezidencë në vitin 2013-të, ndërsa Alban Muja ka qenë pjesë e ArtsLink Residencies në vitin 2010-të.