“Etno Fest”, festival për ruajtjen e kulturës dhe traditës [video]

19 Shtator 2016 - 22:33      

Me një edicion të veçantë dhe të larmishëm sa u përket aktiviteteve kulturore erdhi edhe këtë vit Festivali “Etno Fest”, i cili mbahet në fshatin “Kukaj”.

Për herë të gjashtë, “Etno Fest” shndërroi fshatin “Kukaj” në një atraksion për ta vizituar dhe për t’u njohur për së afërmi me kulturën dhe traditën e shqiptarëve prej viseve të ndryshme.

Festivali mblodhi edhe kësaj radhe artistë të profileve të ndryshme, të cilët u prezantuan me punën e tyre, gjersa edhe shumë të tjerë kishin ardhur thjesht për qejf, ashtu siç nuk mungoi as publiku, raporton emisioni Express në KTV.

Ekspozitat, shfaqjet, filmat, performanca, biseda odash, promovimet e librave dhe ndejat e natës e karakterizuan “Etno Festin” e këtij viti.

Një pjesë e mirë e festivalit u ishte dedikuar ansambleve që me punën e tyre mëtojnë ta ruajnë folklorin shqiptar. Një nga këto ansamble ishte ai nga Shkodra, “Ylber mbi Kala”, i cili mori pjesë për herë të tretë.

Ky ansambël është krijuar rreth 40 vjet më parë, më pas kishte një pauzë, dhe tash e 12 vjet nuk ka ndaluar punën. Merr pjesë nëpër shumë ngjarje me karakter kombëtar e ndërkombëtar.

Me një program të pasur u prezantua edhe grupi folklorik “Podguri” nga Istogu.

Pas këtyre dy grupeve, momenti ishte biseda ode, promovime librash, këngë shahirësh dhe shfaqja e filmit dokumentar për rapsodët Salih dhe Feriz Krasniqi.

Ndërsa, një pjesë tjetër e kësaj hapësire po bëhej gati për shfaqjen teatrore "Të jetosh në ishull" nga teatri "Dodona" i Prishtinës. Me regji të Arbnesha Grabovci – Nixhës, në të luajnë Danjela Marlaj, Enis Metaj e Blerim Hasani. Dhe në fakt, kjo treshe kishte diplomuar me këtë shfaqje me rastin e premierës në Prishtinë, derisa ky ishte një prezantim ndryshe, meqë ata po luanin në një ambient të hapur.
Programi i “Etno Festit” kishte rezervuar vend këtë vit edhe për monodramën “Marr guximin” të Teatrit Kombëtar të Tiranës. Në të luan aktori i njohur shqiptar Mehdi Malkaj, i cili u shpreh i emocionuar nga ajo që kishte parë në këtë fshat dhe në këtë festival.

Për aktorin, “Marr guximin” është një projekt i veçantë.

Për mikpritësin e mysafirëve, regjisorin e njohur Fadil Hysaj, “Etno Fest” ka arritur në fazën e pjekurisë dhe ka fituar publikun e vet.
Ndryshe, në mesin e atyre që kishin ardhur për t’u argëtuar në festival ishte edhe aktorja Teuta Sadiku.

Në këtë festival të veçantë nuk ka munguar as “Arti i magjes ilire”, performancë gastronomike me ushqime ilire nga Ahmet Dursun.

Ky ishte “Etno Fest”-i për këtë vit.

© KOHA. Të gjitha të drejtat janë të rezervuara.