Artistja që hulumton mes imazhit dhe kujtesës [video]

19 Shtator 2016 - 21:06      

Në botën artistike, ajo ka hulumtuar marrëdhëniet në mes të imazhit dhe kujtesës. Teknikat e teatrit të hijeve e frymëzojnë atë që të jetë sa më kreative në artin e saj.

Punimet e artistes bashkëkohore, Venera Kastrati, përfshijnë një betejë mbrojtëse, e cila është kundër çdo gjëje që bën përpjekje t’i heshtë shprehjet e shumta të nevojës për identitet, raporton emisioni Express në KTV.

Fotografi, vizatime digjitale, video, tinguj dhe audi-instalacione, përbëjnë punën artistike të Kastratit, e cila për herë të parë është prezantuar para artdashësve në Prishtinë, me ekspozitën personale “Imazhe të munguara”.

Në këtë ekspozitë të kuruar nga historiani i artit Marco Bazzini, artistja e cila jeton në Milano të Italisë, ka përfshirë elemente, të cilat janë cilësuar si përgjigje ndaj plagëve të llojeve të ndryshme.

Nëpërmjet ekspozitës, të cilën artistja e solli para artdashësve në Prishtinë, ajo shfaqi përpjekjen për të rindërtuar një identitet të vënë në krizë nga një ndarje e detyruar.

Përmes ekspozimit të djepit në të cilin këndohen ninullat, thotë të ketë tentuar lëkundjen e kujtimeve të njerëzve, të cilat shpeshherë i harrojnë ato.
Venera tha se arti i saj do të jetë i bazuar në çështjet që kanë të bëjnë me histori personale të grupeve sociale.

© KOHA. Të gjitha të drejtat janë të rezervuara.