Prishtina, pa skenë qëndrore muzikore [video]

7 Shtator 2016 - 21:08      

Prishtina vazhdon si kryeqyteti i vetëm në rajon, i cili nuk posedon një skenë qendrore për mbajtjen e ngjarjeve të mëdha muzikore. Se a është menduar që gjatë projektit të renovimit të stadiumit të Prishtinës të ndërtohet një skenë e tillë lëvizëse, kuptojmë përmes materialit në vazhdim, raporton KTV.

Çdo kryeqytet llogaritet ta këtë së paku nga një skenë qendrore muzikore, në të cilën interpretojnë përballë mijëra njerëzve emra të mëdhenj të muzikës.

Qyteti i Prishtinës ende vazhdon të vuajë nga mungesa e një skene të tillë.
Ndonëse Ministria e Kulturës, Rinisë dhe Sportit, bashkë me Komunën e Prishtinës, ka ndarë mjete për renovimin e stadiumit të kryeqytetit në qershor të këtij viti, aty nuk është paraparë që të ndërtohet edhe një skenë lëvizëse, e cila do të shërbente për mbajtjen e koncerteve madhështore.

Në disa stadiume të shteteve të rajonit, hapësira ku zhvillohen ndeshjet e futbollit shndërrohen tërësisht në arena të eventeve muzikore.

Emisioni Express ka kontaktuar me zyrtarët e Komunës së Prishtinës, si bashkëfinancuese e këtij projekti me 25 përqind të buxhetit, mirëpo ata theksuan se rreth planit se si do të duket Stadiumi i Prishtinës duhet të pyetet Ministria e Kulturës, e cila për këtë projekt ka ndarë 3 milionë e 800 mijë euro.

Por edhe zyrtarët e Ministrisë së Kulturës nuk u janë përgjigjur pyetjeve të emisionit tonë se a është paraparë që gjatë renovimit të ndërtohet skena lëvizëse dhe zërimi adekuat për organizimin e ngjarjeve muzikore.

Si pasojë e mungesës së një skene të madhe muzikore në Prishtinë, ka mbetur peng mosrealizimi i koncertit të rok-grupit të njohur shqiptar “Gjurmët”.

Sido që të jetë, në hapësirën e stadiumit të Prishtinës kanë zbritur emra gjigantë të muzikës kombëtare dhe ndërkombëtare, ndërkohë deri sa të përfundojë renovimi i tij, organizatorët e koncerteve muzikore duhet të kërkojnë hapësira alternative për realizimin e tyre në kryeqytet.

© KOHA. Të gjitha të drejtat janë të rezervuara.