Aktorët paralajmërojnë protestë kundër ndërhyrjeve politike në Teatrin e Gjilanit

31 Gusht 2016 - 11:08      

Prishtinë, 30 gusht – Një ditë pasi është bërë i ditur lajmi për anulimin e konkursit për drejtor të përgjithshëm të Teatrit të Gjilanit janë shtuar zërat se në këtë proces ka pasur ndërhyrje politike dhe është paralajmëruar protestë, shkruan sot Koha Ditore.

Aktorët rezidentë të Teatrit të Gjilanit, nëpërmjet një njoftimi elektronik, kanë bërë të ditur se sot (e mërkurë) do të mbahet protestë para zyrës së kryetarit të Komunës së Gjilanit, Lutfi Haziri. Siç shkruhet aty, protesta mbahet mbi tri problematika që lidhen me çështjen e këtij institucioni: “Statusin e pazgjidhur të Teatrit të Gjilanit, ndëryrjet politike në procesin e zgjedhjes së drejtorit të përgjithshëm të Teatrit dhe vonesën e pagesave ndaj ansamblit rezidentë të aktorëve”, shkruhet në njoftimin për protestë.

Ndërhyrje politike vendimin për anulim të konkursit, të martën, e ka cilësuar edhe anëtarja e Këshillit Drejtues të Teatrit të Gjilanit, aktorja Adriana Matoshi. Konkursi ishte anuluar pas intervistimit të kandidatëve. (Më gjerësisht mund të lexoni sot në Koha Ditore).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni. 

© KOHA