UNDP-ja mbështet mbrojtjen e trashëgimisë kulturore në Rahovec

18 Gusht 2016 - 12:07      

Nënkryetari i Komunës së Rahovecit, Xhemali Haxhimustafa, ka pritur të mërkurën menaxheren e projektit “Ngritja e besimit nëpërmjet mbrojtjes kulturore në Kosovë”, Nilgun Arif, zyrtaren e projektit, Lorika Hisarin dhe përfaqësuesit e programit të UNDP-së në Kosovë.

Haxhimustafa i ka falënderuar përfaqësuesit e UNDP-së për interesimin e tyre për investime në “Ngritjen e besimit nëpërmjet mbrojtjes kulturore në Kosovë”, duke thënë se janë të gatshëm të bashkëpunojnë për zbatimin e këtij projekti, i cili është i një rëndësie të veçantë për trashëgiminë kulturore në Komunën e Rahovecit. Menaxherja e projektit “Ngritja e besimit nëpërmjet mbrojtjes kulturore në Kosovë”, Nilgun Arif, ka deklaruar se projekti ka të bëjë me rekonstruimin e objekteve të vjetra të trashëgimisë kulturore në Komunën e Rahovecit. Ajo ka theksuar se për realizimin e këtij projekti Komuna e Rahovecit duhet ta propozojë një listë me objekte, të cilat kanë nevojë të rekonstruohen.

“Në kuadër të listës duhet të jepet arsyetimi, shuma dhe vendi i shfrytëzueshmërisë, pasi mjetet janë të kufizuara”, ka thënë ajo.

Vlera e përgjithshme, e cila do të investohet në rekonstruimin e objekteve të trashëgimisë kulturore nëpërmjet projektit “Ngritja e besimit nëpërmjet mbrojtjes kulturore në Kosovë”, është rreth 200 mijë euro.

© KOHA. Të gjitha të drejtat janë të rezervuara.