Përfundoi Festa e Birrës në Korçë, mbi 100 mijë pjesëmarrës

15 Gusht 2016 - 11:55      

Korçë, 15 gusht – Përfundoi mbrëmë në të gdhirë Festa e Birrës në Korçë, e cilësuar si ndër ngjarjet më të mëdha festive turistike në Shqipëri.

Mbi 100 000 persona vizituan Festën e Birrës në 5 netët e organizimit të saj. Kryesisht numri i madh i vizitorëve në festë i atribuohet principeve kryesore të organizimit të festës, ku përfshihet program muzikor me emrat më të njohura të muzikës shqiptare dhe jo vetëm.

Festa e birrës në Korçë u themelua në vitin 2007, si një iniciativë e Bashkisë Korçë.

Festivali është nderuar me çmimin e Turizmit në vitin 2010, për shkak të influencës që pati në rritjen e numrit të turistëve në rajon.

Festa e birrës në Korçë, jo vetëm është një segment i rëndësishëm përsa i përket tërheqjes së vizitorëve në rajon, por nga viti në vit ka promovuar dhe përforcuar imazhin turistik të rajonit.

Agjencia Kombëtare e Turizmit ishte pjesëmarrëse në këtë aktivitet me stendën e saj, ku shpërndau materiale promovuese dhe materiale informative për zona të ndryshme turistike.