Thaçi nderon Dua Lipën me Medalje Presidenciale të Meritave

9 Gusht 2016 - 11:33      

Presidenti i Kosovës, Hashim Thaçi, i cili po qëndron ditëve të fundit në Rio për të përcjellë nga afër pjesëmarrjen e delegacionit të Kosovës në garën Olimpike, ka thënë se së shpejti do ta nderojë me një medalje këngëtaren Dua Lipa.

Kjo për faktin se Lipa është kthyer në sensacion botëror me muzikën e saj.

“Pas suksesit historik të Majlindës dhe ekipit tonë Olimpik, këtë javë do ta takoj edhe Dua Lipën, e cila do të nderohet me Medaljen Presidenciale të Meritave për kontribut kulturës. Kontributi i Duas për muzikë dhe kulturë është i çmueshëm ndërsa përpjekjet e saja humanitare për rininë e Prishtinës veç sa e thellojnë lidhjen e saj me Kosovën”, ka thënë Thaçi, raporton Koha.net.

“Dua Lipa sivjet është dëgjuar nga miliona tifozë të muzikës së saj në botë, por ajo është pasqyrë e rinisë kosovare - të lindur dhe kalitur në kushte të rënda por që sot shkëlqejnë botërisht me kreativitet, dashuri dhe humanizëm”, u shpreh në fund presidenti Thaçi.  

© KOHA. Të gjitha të drejtat janë të rezervuara.