DokuFest e UNDP hapin në Prizren Muzeun e Korrupsionit

8 Gusht 2016 - 16:06      

Në Prizren hap sot zyrtarisht dyert Muzeu i Korrupsionit, ku do të ekspozohen artefakte të cilat pasqyrojnë mënyrat korruptive të jetesës.

Është ky një bashkëpunim mes projektit Anti-Korrupsion të UNDP-së dhe DokuFest-it, Festivalit Ndërkombëtar të Filmit të Shkurtër dhe Dokumentar, që mbahet nga 5 deri në 13 gusht. “Në këtë muze, që ka konotacion sarkastik, do të ekspozohen artefakte të cilat pasqyrojnë mënyrat korruptive të jetesës. Muzeu ka për qëllim vetëdijësimin e qytetarët rreth mënyrave të korrupsionit, në kohën kur ky fenomen është shpërndarë në shumë fusha dhe po lë pasoja në jetën e qytetarëve të Kosovës”, deklaroi UNDP.

Muzeu, i vendosur në qendër të Prizrenit, do të jetë i hapur çdo ditë prej sot e deri më 13 gusht nga ora 12:00 deri në 20:00.

Projekti Anti-Korrupsion i UNDP-së mbështetet nga Zyra Zvicerane për Bashkëpunim (SDC) dhe Ministria e Punëve të Jashtme e Danimarkës (DANIDA).

Organizatorët e DokuFest në Prizren kanë deklaruar se, “korrupsioni është tema qendrore e festivalit të këtij viti”.