Hackerët e bëjnë presidentin “mbrojtës” të Muzeut

4 Gusht 2016 - 10:00      

Prishtinë, 4 gusht - “E mbrojtur nga Hashim Thaçi. Wow”, ka qenë mesazhi në faqen zyrtare të Muzeut Kombëtar të Kosovës në internet, shkruan sot Koha Ditore.

Ata që janë të interesuar të marrin më shumë informacione rreth këtij institucioni e kanë të pamundur që këtë ta bëjnë përmes ueb-faqes. “Shënim: sigurimi juaj është PDK 0 për qind”, është mesazhi tjetër, nën këtë të parin. Të dyja janë të shkruara në gjuhën angleze. Poshtë tyre del një fotografi e presidentit të Kosovës, Hashim Thaçi, me syze dielli me kornizë të bardhë. Në anën e majtë dhe të djathë të tij janë dy pako cigare.

Në njërën shkruan “Hashish”, ndërsa në tjetrën “Thaçi”. Sipër kokës janë dy duar që shtinë me mitraloz. Ndërsa dy lloje të çokollatave krejt sipër tij. Aty shihen edhe dy kamera, derisa në sfond gjenden postere të ndryshme. Një prej tyre bart superheroin e filmave të animuar “Saiyan Gogu”. Aty nuk mungojnë as paratë. Krejt në fund të këtij posteri shihen dy tuba me dollarë.

Me një ilustrim të tillë, hackerët kanë sulmuar faqen zyrtare të Muzeut Kombëtar (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.