Kosova me pak filma kërkon ta gjejë kandidatin e vet për “Oscar”

2 Gusht 2016 - 09:21      

Prishtinë, 2 gusht - Për të tretën herë me radhë, Kosova do t’ia mësyjë garës për t’u futur në listën e ngushtë të nominimeve për “Oscar” në kategorinë e filmit më të mirë në gjuhë të huaj, shkruan sot Koha Ditore.

Por sikurse viteve të kaluara, opsionet nuk janë të shumta. Bazuar në thirrjen për aplikim, deri më tani janë dy filma të bashkëfinancuar nga Qendra Kinematografike e Kosovës që plotësojnë disa prej kushteve për t’ia propozuar komisionit. “Home Sweet Home” i Faton Bajraktarit, i cili u dha premierë në prill të këtij viti dhe “Engjëjt janë larg” i Gjergj Xhuvanit janë filmat e metrazhit të gjatë të mbështetur nga shteti që janë dhënë premierë midis datave të përcaktuara me thirrjen për propozime që u bë publike të hënën.

Ndryshe nga dy vitet e kaluara, nëse kandidati i Kosovës ia del që së paku të merret në shqyrtim nga “Academy of Motion Picture Arts and Sciences” aty mund të llogarisë në një përkrahje. Është pikërisht regjisori Donoughue, i cili e ka premtuar këtë, në qershor të këtij viti, kur u bë anëtar i Akademisë që ndan çmimet prestigjioze. “’Shok’ natyrisht ishte një prej arsyeve kryesore pse unë jam ftuar nga Akademia… Ndiej se do ta përfaqësoj jo vetëm Britaninë e Madhe, por edhe Kosovën gjithashtu”, kishte thënë Donoughue kur ishte pranuar në mesin e 638 anëtarëve të rinj të Akademisë (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.