Nis studimi i gurëve mbivarrorë në Teqenë e tarikatit Sinani në Prizren

29 Korrik 2016 - 12:01      

Prizren, 29 korrik - Qendra Rajonale për Trashëgimi Kulturore në Prizren, të enjten, ka njoftuar se ka filluar së zbatuari projektin “Studimi i gurëve mbivarrorë në Teqenë e tarikatit Sinani” në lagjen Terzimahallë të qytetit të vjetër, që realizohet në kuadër të zbatimit të politikave programore të Ministrisë së Kulturës, të Rinisë dhe të Sporteve. Kjo hapësirë prej kohësh ka qenë e lënë pas dore dhe ka qenë në gjendje të mjerueshme, shkruan sot Koha Ditore.

Drejtori i QRTK-së në Prizren, Samir Hoxha, ka theksuar se ky projekt i rëndësisë së veçantë është i pari i kësaj natyre, që ka për qëllim pastrimin e gurëve mbivarrorë, të cilët deri më tani kanë qenë në gjendje mjaft të rëndë fizike. Sipas tij gjatë këtij procesi të punës do të bëhet edhe dokumentimi i gurëve mbivarrorë, dokumentimi grafik dhe vizual si dhe leximi dhe deshifrimi i shkrimeve në gjuhën e vjetër osmane në gurët e varrezave të Teqesë së tarikatit Sinani në Prizren.

Në bazë të të dhënave të prezantuara nga QRTK, Teqeja e tarikatit Sinani në Prizren është themeluar nga sheh Ali Efendi Rexhep Koro rreth vitit 1768 (gjerësisht, sot në “Kohën Ditore”).

Gazetën Koha Ditore mund ta lexoni edhe online. Këtu mund të gjeni sqarimin se si mund të abonoheni.

© KOHA. Të gjitha të drejtat janë të rezervuara.