Alban Nimani me performancën “E bardhë” në Tiranë

14 Maj 2014 - 18:33      

Galeria Kombëtare e Arteve është shndërruar në skenën e një performance intermediale, mbrëmjen e së martës, ideuar dhe realizuar nga artisti Alban Nimani.

Pas Prishtinës, për herë të parë është prezantuar edhe në Tiranë, kjo performancë e titulluar “E bardhë”.

“Duket se e bardha është ndoshta ngjyra më e sinqertë, më e pastër, ndërsa ndjenja e kësaj shfaqjeje, ideve, kanë qenë tërësisht nga thellësia ime. Pastaj është edhe fakti që e bardha i nxjerr gjithë njollat në dukje, pra i shfaq të gjitha të këqijat. Për mua, kjo gjë më ndodhi në kohën kur më erdhi në jetë djali, gjë që ishte si një ndjenjë shpërthyese e trurit”, thotë artisti Alban Nimani, transmeton tch.

Performanca ishte një gërshetim i multimedias me muzikën elektronike të luajtur “live”, poezisë dhe baletit kontemporan.

“Jam munduar të eksperimentoj me gjithë këto mediumet e reja që janë futur dhe përdoren sot në botë, për të ndërtuar një farë ndërthurjeje mes të gjitha këtyre mediumeve. Është thjesht një intermedial performance, si një fushë e re që e kemi futur sot edhe në Fakultetin e Arteve si lëndë të re, kështu që do të ketë edhe performanca të tjera shpresoj prej studentëve”, përfundon Alban Nimani.