Arrestohen grabitësit e barnatores

6 Shkurt 2017 - 14:57      

Policia e Kosovës njofton se është bërë i ditur identiteti i tre të dyshuarve të cilët më 3 shkurt, rreth orës 20:45 minuta, dy prej tyre të maskuar dhe të armatosur me thika, kanë hyrë në barnatoren “Vjosa Farm” dhe nën kanosje serioze kanë grabitur arkën e farmacisë dhe kanë ikur në drejtim të kompleksit banesor “Fidanishte”.

Sipas hetuesve të cilët e kanë trajtuar rastin, thuhet se aty i ka pritur i dyshuari i tretë me një automjet të llojit BMW, transmeton Koha.net.

Gjatë intervistave veç e veç, në prani të avokatëve mbrojtës është kuptuar deri në detale se si është kryer grabitja. Për rezultatin e hetimeve është informuar prokurori i shtetit i cili ka nënshkruar vendimet mbi ndalimin e grabitësve. Po ashtu, në cilësi të provës materiale është sekuestruar edhe vetura e dyshuar. 

© KOHA. Të gjitha të drejtat janë të rezervuara.