Kapen në Gjilan grabitësit e çantës së një femre

2 Shkurt 2017 - 11:18      

Policia në Gjilan ia ka dalë të identifikojë e pastaj edhe t’i arrestojë dy grabitës të çantës së një femre, që kishte ndodhur më 31 janar në orën 19.

Dy shqiptarë, shtetas të Kosovës, dyshohet të kenë grabitur çantën e dorës viktimës femër, shtetase e Kosovës, e cila ishte duke ecur së bashku me vajzën e saj. Policia e Kosovës, Njësitet e hetimeve nga Stacioni Policor i Gjilanit, në bazë të përshkrimit të të dyshuarve kanë arritur që t’i identifikojnë dhe më pastaj t’i arrestojnë të dyshuarit, - thuhet në raportin e sotshëm të Policisë së Kosovës. Raporti në vazhdim saktëson se gjatë kontrollimit të të dyshuarve tek ata është gjetur çanta e viktimës me dokumente dhe para.
Me urdhër të prokurorit të dyshuarit janë ndaluar për 48 orë.