Rasti i Ilir Tolajt kthehet në rigjykim

17 Janar 2017 - 15:59      

Apeli ka kthyer në rigjykim rastin Ilir Tolaj e të tjerë. Ministria e Shëndetësisë po ashtu ia konfirmoi “Kohës Ditore” pezullimin e dy zyrtarëve të saj për shkak të përfshirjes në këtë rast. Ata janë shefi i Farmacisë, Bekim Fusha, dhe zyrtari i prokurimit Ismet Hyseni.

Kolegji i Gjykatës së Apelit në përbërje me shumicë të gjyqtarëve të EULEX-it ka lëshuar aktgjykimin e datës 13 shtator 2016 në lëndën e Ilir Tolaj, Arbenita Pajaziti, Hajrullah Fejza, Ismet Hyseni, Zenel Kuçi, Bujar Bukoshi dhe Bekim Fusha.

Ankesa e parashtruar nga PSRK është miratuar pjesërisht. Ankesa e parashtruar nga avokati mbrojtës në emër të H.F. është refuzuar si e pabazë. Ankesa e parashtruar nga avokati mbrojtës në emër të I.T. pjesërisht është refuzuar si e pabazë dhe pjesërisht është shpallur si jo relevante. Ankesa e parashtruar nga avokati mbrojtës në emër të A.P është shpallur si jo relevante.

Aktgjykim i Gjykatës Themelore në Prishtinë i datës 19 korrik 2013, lidhur me disa pikat e akuzës është anuluar dhe është kthyer për rigjykim. Aktgjykimi i Gjykatës Themelore në Prishtinë i datës 19 korrik 2013 sa i përket pikave të tjera të akuzës është vërtetuar.

Lënda penale ka të bëjë me procesin e tenderimit të mbajtur në Ministrinë e Shëndetësisë në vitin 2007 si dhe 2010-2011.

Aktgjykimi i Gjykatës Themelore në Prishtinë i datës 19 korrik 2013: http://www.eulex-kosovo.eu/en/pressreleases/0455.php

© KOHA. Të gjitha të drejtat janë të rezervuara.