Gjykata në Ferizaj e lë për nesër vendimin përfundimtar për Rizvanollin

29 Dhjetor 2016 - 15:28      

Gjykata Themelore, përmes një njoftimi ka bërë me dije se ka lënë për nesër vazhdimin e seancës gjyqësore për shpalljen e aktgjykimit ndaj Fatos Rizvanollit.

Ai akuzohet për veprën penale Rekrutimi për terrorizëm.

“Ju njoftoi se nesër me date 30.12.2016 ora 14:00 në Gjykatën Themelore në Ferizaj vazhdon seanca gjyqësore me shpalljen e aktgjykimit, ndaj të pandehurit F. R. i akuzuar për shkak të veprës penale ‘Rekrutimi për terrorizëm’ nga neni 139 lidhur me nenin 31 KPRK-së”, thuhet në njoftim.

Kujtojmë se në seancën e sotëm, që e ka përcjell nga afër KTV-ja, Prokuroria ka kërkuar dënim me burgim për Fatos Rizvanollin për vepra penale të terrorizmit.

Në fjalën përfundimtare prokurori ka kërkuar edhe konfiskim të pasurisë që është përdorur për kryerjen e kësaj vepre.

Sipas aktakuzës, Rizvanolli ka rekrutuar që nga viti 2011, kosovarë që të shkojnë për të luftuar për ISIS-in dhe Al Nusra në Siri.

“Provat kanë dëshmuar që Fatos Rizvanolli përpos ideologjisë ai ka bashkëpunuar ngushtë dhe ka qenë rekrutues i personave për organizatën ISIS dhe Al Nusra. Ai gjithashtu me vetëdije ka ofruar gjithë pasurinë e tij dhe ka dhënë të holla për personat që kanë shkuar për të luftuar krahë ISIS në zonat e konfliktit në Siri. Ndihmë ka dhënë duke u paguar bileta personave që kanë udhëtuar drejt Sirisë dhe ka paguar qira për xhaminë te Termokosi, që nuk ka qenë pjesë e BIK dhe ku janë strehuar persona të ndryshëm që kanë shkuar pastaj në zona të konfliktit”, ka thënë prokurori Elez Blakaj në fjalën e tij përfundimtare.

Besnik Berisha, avokat i të dyshuarit, ka thënë se i pandehuri është gabimisht aty.

“Ne jemi këtu për të kërkuar drejtësi. Gabimisht i pandehuri është këtu. Prokuroria ka dështuar çfarëdo lidhje së Fatos Rizvanollit me blerjen e biletave”, tha Berisha.

Disa nga veturat e Rizvanollit, sipas aktakuzës janë përdorur edhe nga i shumëkërkuari Lavdrim Muhaxheri dhe i dënuari për terrorizëm Zekirja Qazimin, përcjell Koha.net. Seanca po vazhdon me fjalën përfundimtare të mbrojtjes së Fatos Rizvanollit.

© KOHA. Të gjitha të drejtat janë të rezervuara.