Detaje nga arrestimi i 59 zyrtarëve policorë për marrje ryshfeti [Raport i KTV-së]

19 Dhjetor 2016 - 19:06      

59 pjesëtarë të Policisë së Kosovës janë arrestuar nën dyshimet për përfshirje në veprat penale, marrje ryshfeti dhe keqpërdorim të detyrës zyrtare.

Në mesin e këtyre zyrtarëve policorë janë 35 shqiptarë, 23 serbë dhe një nga komuniteti boshnjak, raporton KTV.

Pas urdhrit të prokurorit, ata janë dërguar në qendrat e ndalimit.

“Krejt kjo është bërë pas një hetimi katër-mujor. Për të gjithë është kërkuar suspendimi i tyre nga policia”, ka thënë kryeshefi i Inspektoratit Policor të Kosovës, Hilmi Mehmeti, në konferencën e jashtëzakonshme për media, të mbajtur pas përfundimit të aksionit.

Kurse, kryeprokurori i Mitrovicës, Shyqri Syla, ka thënë se ata janë hetuar nëpërmjet masave të fshehta, si audio dhe video -incizimeve.

“Hetimet kanë nisur pas marrjes së shumë informatave nga qytetarët, të cilët kanë raportuar për marrje ryshfeti. Komuna e Mitrovicës është më e goditura nga ky aksion”, ka thënë Syla.

Shumica e zyrtarëve të ndaluar janë pjesëtarë të njësisë së trafikut dhe të kontrollit të autostradës.

Gjithashtu, në këtë konferencë është bërë e ditur se edhe 30 qytetarë do të ndiqen për dhënie ryshfeti.

© KOHA. Të gjitha të drejtat janë të rezervuara.