Kapet hajni i njëmbëdhjetë shtëpive në Restelicë

13 Dhjetor 2016 - 11:34      

Pas një pune hetimore intensive trejavore të Policisë Dragashit për zbulimin e kryerësit të tentim vjedhjes dhe dëmtimit të dyerve ose bravave të njëmbëdhjetë shtëpive në Restelicë të Dragashit që pati ndodhur me 22 nëntor, dje përfundimisht është identifikuar i mituri E. B. i vitlindjes 2000 i komunitetit goran, ka njoftuar policia.

Gjatë hetimit policia kishte pyetur rreth 40 qytetarë.

“Po ashtu edhe krim teknikët që kishin kryer hetime ne vendin e ngjarjes, dëshmitë e mbledhura i kishin dërguar në Drejtorinë Rajonale në Prizren, gjegjësisht në Zyrën e AFIS-it që merret me hetimin dhe gjurmimin e gjurmëve të gishtërinjve të cilat gjenden në vendin e ngjarjes dhe sipas krim teknikëve, janë gjetur gjurmë të mjaftueshme gishtërinjsh të të dyshuarit të mitur”, transmeton KP njoftimin e policisë.

Nga hetues policorë, në prani të avokatit mbrojtës dhe prindit është intervistuar i dyshuari dhe pas intervistës është informuar prokurori i Shtetit i cili ka urdhëruar që i dyshuari të ndalet nën masën e arrestit për 24 orë, ndërkaq, kallëzimi penal dhe provat materiale do t’i kalojnë prokurorisë për procedura të më tejme.