Nga shpërthimi në “Zahir Pajaziti” veç dëme materiale

9 Dhjetor 2016 - 23:04      

[E plotësuar, 23:30] Policia e Kosovës ende nuk ka bërë të qartë detaje të ngjarjes të së premtes mbrëma, me shpërthimin që ndodhi në sheshin “Zahir Pajaziti” në Prishtinë, pak pasi që aty ka përfunduar koncerti i rock grupit të njohur kosovar “Troja”.

Gazetari i Kohës Ditore ka qëndruar në vendin e ngjarjes, ndërsa ka treguar se pos dëmeve materiale të një lokali afër vendit të ngjarjes nuk ka dëme të tjera.

Burimet i kanë thënë gazetarit të Kohës Ditore se policia tashmë ka marrë pamjet nga kamerat e sigurisë në lokalet përreth dhe është vënë në hetim të rastit. Policia ka rrethuar vendin e ngjarjes dhe nuk po lejon që të afrohet askush.

Shpërthim në sheshin “Zahir Pajaziti”

Një shpërthim është dëgjuar në qendër të kryeqytetit, fare pranë vendit ku po mbahej koncerti i rok grupit të njohur kosovar “Troja”.

Shpërthimi në sheshin “Zahir Pajaziti” ndodhi pasi përfundoi koncerti aty.

Asnjë person nuk është lënduar nga ky shpërthim. Policia e Kosovës ka dalë në vendin e ngjarjes, por nuk ka dhënë më shumë detaje.

Koha.net ka provuar të kontaktojë me zyrtarët policorë por një gjë të tillë të premten mbrëma e ka pasur të pamundur.

© KOHA. Të gjitha të drejtat janë të rezervuara.