[Te Linda] Ragu me mish viçi [video]

8 Shkurt 2015 - 11:49      

Recetë e radhës e Lindës, ku do të mësoni se si të gatuani ragu me mish viçi.

Përbërësit:
1 qepë
4-5 thelpinj hudhër
1 karotë
1 degë selino
300 ml salcë domatesh
500 gr. mish viçi
Vaj ulliri
Kripë/piper
½ lugë çaji spec të kuq pluhur
50 ml. verë të bardhë (sipas dëshirës)
Palentë

Përgatitja:

Fillimisht ngrohim pak tavën. Ndajmë mishin në copë të vogla. Shtojmë vajin e ullirit në enë, ku pastaj hedhim mishin e copëtuar. Deri sa të skuqet pak mishi, shtojmë ujë, kripë dhe pak vaj ulliri ose gjalpë në një enë tjetër.

Pak para vlimit shtojmë miell në enën e dytë. Fillojmë të prejmë perimet.

Në gjithë perimet, karrotat i prejmë më të imta, pasi që i duhet më shumë kohë për zierje.

Pasi të skuqet mishi, e largojmë nga aty, kurse në yndyrën e njëjtë në të cilin është bërë skuqja e tij, vazhdojmë me perimet.
Hedhim perimet në enë dhe i përziejmë mirë.

Shtojmë kripë, pak spec të djegës (të bluar), pak borzilok dhe majdanoz të freskët e piper të zi.

Në fund, shtojmë edhe salcën e domateve.

Përziejmë mirë masën.

Kësaj mase mund t'i shtoni pak verë të bardhë ose ujë.
Kthejmë mishin në masën e perimeve.

Vazhdon zierja përafërsisht për rreth gjysmë ore, deri sa perimet të shkrihen dhe mishi të zbutet.

Pas gjysmë ore, servohen raguja dhe palenta.

Ju bëftë mirë!