Në Podujevë filloi festivali “Teatri Ndryshe”

26 Korrik 2013 - 11:11      

Me shfaqjen “Ne vijmë për ajër" të trupës së teatrit “Metropol” nga Tirana në Podujevë ka filluar edicioni i pestë i Festivalit Ndërkombëtar të teatrit Ambiental “Teatri ndryshe”.

Podujevë, 26 korrik   - Me shfaqjen “Ne vijmë për ajër" të trupës së teatrit “Metropol” nga Tirana në Podujevë ka filluar edicioni i pestë i Festivalit Ndërkombëtar të teatrit Ambiental “Teatri ndryshe”.

Hapja solemne e edicionit të pestë të Festivalit u bë të enjten në Skenën e hapur në kuadër të kompleksit të Qendrës së Kulturës në Podujevë, transmeton Qik-u. Në praninë e shumë artdashësve festivalin e ka hapur kryetari i Komunës së Podujevës, Agim Veliu, nën përkujdesjen të cilit mbahet ky festival.

Duke përshëndetur të pranishmit dhe duke i dëshiruar mirëseardhje komunitetit artistik të këtij festivali, kryetari Veliu ka thënë se Festivali i Teatrit Ndryshe në Podujevë,veç traditës, pjesëmarrjes tej hapësirës nacionale, komunikimit e ndërkomunikimit përmes magjisë së fjalës e lojës në skenë, ka tendencën të pasurohet edhe me formate të tjera shoqëruese.

“Po ngre siparin sonte ‘Teatri Ndryshe’, ngjarje kjo për kulturën jo vetëm për Podujevën, ku dramaturg, regjisorë e aktorë do performojnë vepra e do të përçojnë mesazhe, ide e përmbajtje me art e ku komunikimi me ne, me publikun është tej të rëndomtës, por shpirti e ndjenje”, tha Veliu.

Ai theksoi se një vi më parë në çelje të Festivalit, ishte zotuar se në kapacitetin e kryetarit të Komunës do bëjë gjithë çfarë kërkohet për ta jetësuar kërkesën legjitime të komunitetit artdashës të Podujevës për themelimin e Teatrit Publik të Qytetit të Podujevës.

“Kjo tashmë është realizuar, Teatri Publik i Qytetit me vendim të Kuvendit të Komunës është institucion i formuar dhe i emërtuar me shëmbëlltyrën e aktorit të çmuar Avdush Hasani”, tha kryetari Veliu.

“Skena e ‘Teatrit Ndryshe’ le të jetë event i prezantimit krijues, i lojës dhe komunikimit çfarë vetëm arti bën e mundet dhe që fiksionet e projeksionet t’na nxisin në koekzistencë vlerash, n’dlirësi e fisnikëri shpirti dhe paqëtim e harmoni me veten e të tjerët”, tha kryetari I Komunës, duke e shpallur të hapur edicionin e pestë të këtij festivali.

Ishte shfaqja e trupës teatrore e teatrit “Metropol” nga Tirana me shfaqjen “Ne vijmë për ajër” nga Skot O'Mur, në regjinë e Qëndrim Rijanit, ajo që e hapi festivalin.

Shfaqja u mirëprit nga shikuesit dhe komuniteti artistik, duke vlerësuar lart regjinë dhe lojën e artistëve në skenë.

Regjisori i mirënjohur kosovar, Ekrem Kryeziu përgëzoi regjisorin e shfaqjes, Qëndrim Rijanin për guximin e tij artistik që të vë në skenë një vepër kaq komplekse të artit modern.

Në mbrëmjen e parë të festivalit u prezantua edhe trupa e Fakultetit të Arteve me shfaqjen “Agmia”.

Organizuar nga Drejtoria për Kulturës Rini dhe Sport në Podujevë edicioni i pestë i Festivalit “Teatri Ndryshe” do të zgjasë nga data 25 deri më 30 korrik 2013.

Në festival do të marrin pjesë trupat teatrore nga Shqipëria, Rumania, Bosnja e Hercegovina dhe Kosova të cilat para publikut llapjan do të prezantohen me 13 shfaqje.

Shfaqjet do të jepen në Sallën e Teatrit të Qytetit në Podujevë, në Sheshin e Qytetit dhe në Parkun tek Posta.

Pjesëmarrjen në festival e kanë konfirmuar katër trupa teatrore nga Tirana, dy nga Bosnja e Hercegovina, një nga Rumania dhe gjashtë trupa teatrore nga qytete të ndryshme të Kosovës (tri nga Prishtina dhe nga një Mitrovica, Peja dhe Ferizaj).