Kina nis linjën hekurudhore me Londrën – 18 ditë rrugëtim njëdrejtimësh

3 Janar 2017 - 17:32      

Kina ka nisur shërbimin e saj të parë me tren transportues mallrash për në Londër nga Yiwu, një qytet i famshëm për tregti me shumicë në provincën lindore të Zhejiangut, ka raportuar agjencia e lajmeve “Xinhua”.

Treni do të përshkojë për 18 ditë më shumë se 12 mijë kilometra për të arritur në Britani nga Kina. Do të kalojë përmes Kazakistanit, Rusisë, Bjellorusisë, Polonisë, Gjermanisë, Belgjikës dhe Francës para se të arrijë në Londër, transmeton Koha.net.

Ish-kryeministri britanik, David Cameron, kishte habitur aleatët e tij kur kishte thënë se Britania do të jetë portë kyçe për Perëndimin për investimet nga Kina dhe kishte propozuar që ta bëjë Londrën një prej qendrave kryesore tregtare ndërkombëtare.

Kryeministrja e tashme, Theresa May, ka thënë se marrëdhëniet me Kinën mbesin “të arta” tani që synon të sjellë në vend miliarda dollarë nga investimet kineze në kohën kur Britania përgatitet të dalë nga Bashkimi Evropian.  

© KOHA