Dalin në shitje figurat e Clintonit e të Trumpit në pozita të palakmueshme [foto]

7 Nëntor 2016 - 21:23      

Hillary Clinton dhe Donald Trump janë figurat më të reja të statujave tradicionale spanjolle në pozita duke kryer jashtëqitje dhe kanë dalë në shitje në Barcelonë në një seri satirike tani që zgjedhjet presidenciale në SHBA kanë hyrë në fazën finale.

Të njohura si “caganers” (“dhjerësit”), figurat e vogla kanë origjinën në Kataloni, rajoni verilindor i Spanjës, dhe kryesisht kanë paraqitur personazhe të famshme e politike, ndërsa tradicionalisht fshiheshin nëpër vende të ndryshme në mënyrë që miqtë apo familjarët t’i gjenin, transmeton Koha.net.

Meqë besohet se një figurë e tillë sjellë përparim dhe fat për vitin pasues, “caganers” kanë tërhequr blerësit ndërkombëtarë ndërsa SHBA-të janë blerësit më të mëdhenj me 40 për qind të shitjeve, sipas caganer.com.

E tashmë figurat e Trumpit dhe Clintonit kanë dalë në shitje në Barcelonë.

“Në fillim kemi shitur më shumë Donald Trumpin “dhjerës” por tani Hillary Clinton e ka zënë atë në këtë moment. Nuk e kemi idenë se kush do ta zë vendin e parë”, ka thënë për Reuters Marc Alos, pronar i caganer.com. 

© KOHA