Në Çeki zbulohet shpella më e thellë nënujore në botë [foto]

19 Tetor 2016 - 11:49      

Një grup hulumtuesish çeko-polak, me ndihmën e grantit të National Geographic Society, ka zbuluar se Hranicka Propast (Humnera Hranice) ka thellësi prej së paku 404 metrash, raporton National Geographic.

Zhytësi polak Krzysztof Starnawski udhëhoqi grupin në këtë shpellë mahnitëse nënujore së bashku me David Canin, i cili i ndihmoi atij si zhytës sigurie.

Gjatë kësaj ekspedite, Starnawski është zhytur në një thellësi prej 265 metrash para se të lëshonte ROV-in (një pajisje zhytëse që zbulon thellësitë më të mëdha) për të vazhduar më tej brenda kësaj shpelle nënujore, transmeton Koha.net.

Starnawski, i cili ka bërë shumë zhytje në Humnerën Hranice gjatë 20 vjetëve të fundit, vitin e kaluar ka gjetur një hapësirë të ngushtë të cilën ai e ka çarë më shumë për të vazhduar më tej eksplorimin.

“ROV-i mund të shkojë përtej kufijve të një zhytësi dhe po ashtu mund të depërtojë në hapësirat e ndryshme”, ka thënë Starnawski për National Geographic. “Grupi ka konfirmuar se matjet e ROV-it janë të sakta”, ka shtuar Starnawski.

Shoqëria e Shpelltarisë e Çekisë beson se kjo shpellë mund të ketë thellësi edhe më të madhe. “Ajo [pajisje] shkoi aq thellë sa e kishte litarin, por fundi i shpellës nuk ishte askund”, ka thënë kjo shoqëri në një deklaratë, sipas “The Guardian”.

Shpella në fjalë është hulumtuar për herë të parë më 1999.

© KOHA