Shitet me çmim marramendës konjaku i vitit 1801

19 Tetor 2016 - 08:56      

Një markë britanike pijesh alkoolike ka arritur të shesë një shishe konjak të vjetër për rreth 270,000 dollarë. Bëhet fjalë për një Massougnes 1801 Cognac, që zotërohet nga “Brandy Classics” për më shumë se 20 vite.

Blerësi është një person nga Lindja e Largët, i cili do të ketë nderin që të provojë konjakun që është bërë në vitin 1801.

Mendohet se kjo shishe është pija alkoolike që është shitur më shtrenjtë në histori. David Baker, i cili ka themeluar “Brandy Classics” në vitin 1980, tha: “Na ka habitur të gjithëve shitja e këtij konjaku. Kishte një çmim shumë të lartë dhe nuk e prisnim ta blinte njeri. Jemi shumë të emocionuar”.

Vitin e kaluar, një shishe konjak e vitit 1805 u ble për pak më shumë se 180,000 dollarë.