Kush t’i besojë më Thaçit

11 Maj 2014 - 08:17 - Agron Bajrami      

Në këtë fushatë të tij, kryeministri Thaçi ka tejkaluar edhe veten, duke premtuar miliarda euro në shkëmbim të votës së qytetarëve, rritje të përvitshme të pagave për shërbyesit civilë, mësuesit e punëtorët mjekësorë, subvencione milionëshe për bujqit, vende pune për të gjithë të tjerët, shkollim pa pagesë, investime pa kufi… por, sa mund t’i besojnë qytetarët atij tani?

Javë të tëra para shpërbërjes tragjikomike të Kuvendit të Kosovës dhe shpalljes së paralajmëruar të zgjedhjeve të parakohshme për 8 qershor nga presidentja e vendit, kryeministri i Kosovës, Hashim Thaçi, i ka hyrë garës zgjedhore me energji dhe entuziazëm, duke kërkuar që votuesit t’i japin edhe një mandat qeverisës, të tretin me radhë, pas shtatë viteve sa ka udhëhequr ekzekutivin e vendit.

Në këtë fushatë të tij, Thaçi e ka tejkaluar edhe veten, duke premtuar miliarda euro në shkëmbim të votës së qytetarëve, rritje të përvitshme të pagave për shërbyesit civilë, mësuesit e punëtorët mjekësorë, subvencione milionëshe për bujqit, vende pune për të gjithë të tjerët, shkollim pa pagesë, investime pa kufi…

Kështu, Hashim Thaçi i fushatës zgjedhore po ofrohet si një lloj alternative e Hashim Thaçit të shtatë viteve të kaluara në pushtet. Dhe kjo nuk është rastësi, sepse fushata është ndërtuar qëllimisht për të përçuar mesazhin e distancimit të Thaçit nga qeverisja e tij shtatëvjeçare.

Natyrisht, vetë Thaçi dhe ekipi i tij nuk do ta pranojnë këtë publikisht, por në radhët e tyre tashmë është e qartë se realiteti brenda të cilit ata kërkojnë votën edhe për një mandat është shumë negativisht i pozicionuar ndaj qeverisjes së deritanishme, të cilën një pjesë e madhe e popullatës tashmë e shohin si periudhë e skandaleve, korrupsionit, kompromiseve politike, stagnimit ekonomik, rritjes së pasigurisë sociale, thellimit të hendekut mes njeriut të rëndomtë në njërën anë, dhe njeriut në pushtet, politikë e biznes, në anën tjetër!

Andaj, nuk është për t’u çuditur se në më shumë se një mënyrë, kryeministri i Kosovës, dhe kryetar i PDK-së, para votuesve të vendit ka kohë që po merr pozën e një opozitari të sertë, i cili premton ndryshime dramatike nëse fiton pushtetin.

* * *

Por, para se të shkojmë drejt së ardhmes, pyetja për të cilën njerëzit kërkojnë përgjigje sot është: kush është përgjegjës për këtë situatë të cilën tani të gjithë duam ta ndryshojmë?

Dhe kush është përgjegjës për nivelin e lartë të korrupsionit, që prej Kosovës ka krijuar një shoqëri të ndarë, ku një grusht njerëzish në pushtet dhe afër tij, gëzojnë pjesën dërrmuese të të mirave shoqërore, derisa të tjerët vuajnë pasojat e keqpërdorimit të parasë publike.

Kush është përgjegjës për sistemin e klientelizmit dhe nepotizmit, që ndërmarrjet publike dhe administratën shtetërore i ka shndërruar në klube partiake e farefisnore, ku kriteri i vetëm që nuk merret parasysh në punësim është aftësia profesionale?

Kush është përgjegjës për dështimin e sistemit të drejtësisë, i cili, së fundi, solli deri tek miratimi skandaloz i krijimit të një Gjykate Speciale për Kosovën, për akomodimin e së cilës kushdo që do t’i fitojë votat dhe të ulet në Kuvendin e ardhshëm do të duhet të miratojë ndryshime kushtetuese dhe ligjore.

Kush është përgjegjës për rihapjen e bisedimeve me Serbinë, koncesionet e reja që janë bërë dhe do bëhen në veri, dështimin e sigurimit të integritetit dhe sovranitetit të plotë të vendit, në çdo metër nga 10.887 kilometrat katrorë sa ka zyrtarisht Kosova?

Kush është përgjegjës për dështimin e sistemit arsimor që prodhon njerëz të padijshëm dhe glorifikon plagjiatorët e falsifikatorët?

Kush është përgjegjës për nivelin e papunësisë që nuk është zbutur me vite të tëra, përfshirë këto shtatë vitet e fundit të qeverisjes Thaçi?

Kush është përgjegjës për ekonominë pa kurrfarë vizioni, e cila Kosovën e mban në fund të listës së vendeve ku investohet, ku prodhohet, ku ka rritje të qëndrueshme ekonomike?

Kush është përgjegjës që situatën në shëndetësi, shërbime publike, energjetikë, infrastrukturë, kulturë, sport e tregti, nëse jo kreu jo vendit?

Natyrisht, nuk është vetëm një njeri përgjegjës për të gjitha, por ai njeriu në majë të pushtetit, siç ka qenë tash e shtatë vite kryeministri Thaçi, është kryepërgjegjësi për dështimet sistemore e politike të Kosovës, dhe si i tillë, sot, para se të kërkojë votën, do të duhej të përballej me këtë realitet që e rrethon atë dhe neve.

Pra, pyetja që shtrohet para qytetarëve, por edhe para vetë Thaçit, është: A mund të ndryshojë Kosova pa u ndërruar edhe pushteti?

Ndoshta shembulli nga zgjedhjet e fundit në Kosovë, zgjedhjet lokale të vitit të kaluar, tregon qartë se si e konceptojnë ndryshimin e kërkuar votuesit kosovarë: në shumicën e komunave pushtetet janë ndërruar!

* * *

Sigurisht, në fushatën e vet, Thaçi nuk përmend fjalën ndryshim. Ai tani flet për një Mision të ri!

Por çka ndodhi me Misionin e Vjetër? Çka ndodhi me premtimet e para katër viteve? Po me ato të para shtatë viteve?

Siç mund të lexoni në temën e kësaj jave, në këtë gazetë, pjesa dërrmuese e premtimeve të kaluara të Thaçit nuk është përmbushur, ndërsa edhe ato që janë përmbushur, janë përmbushur me kosto të ngritura dhe vonesa të mëdha.

Dhe, me këtë histori premtimesh të papërmbushura dhe besimit të tradhtuar, kush mbetet për t’i besuar Thaçit se do t’i përmbushë premtimet që jep sot?

Sigurisht, nuk është se të gjithë kanë vuajtur në sistemin e kësaj Qeverie, dhe tani të gjithë edhe do t’ia kthejnë shpinën. Jo. Një numër njerëzish ka përfituar nga kjo qeveri, qoftë përmes afërsisë politike me partitë në pushtet, qoftë përmes punëve në hije që u kanë krijuar qasje në përfitime nga buxheti shtetëror. Dhe këta, nuk kanë pse besojnë në premtimet zgjedhore. Këta, në fakt, shpresojnë që të mos ketë fare ndryshime.

Por, pjesa tjetër, ajo që do të mund të përcaktojë fituesin e zgjedhjeve (nëse votimi dhe numërimi do të jenë të rregullt), nuk e ka asnjë arsye për t’i besuar më kryeministrit aktual.

Sepse, kredibiliteti i një politikani, sikur edhe i çdo njeriu, çfarëdo pune që bën, është fjala që jep.

Në rastin e fjalëve që sot jep Thaçi, argumenti kryesor që konteston kredibilitetin dhe besueshmërinë është vetë ai, me punën e keqe që ka bërë në shtatë vitet e fundit.

agronb@kohaditore.com

comments powered by Disqus

Vështrime tjera

Enver Robelli

Enver Robelli

Muret

A do t’ia shesin serbët Donald Trumpit murin e Mitrovicës? A është dizajnuar ende flamuri i Bashkësisë së Komunave Serbe? Muri, n...

Augustin Palokaj

Augustin Palokaj

Rastet e humbura për njohje ndërkombëtare të Kosovës

Kur liderët e Serbisë në takime në Bruksel ankohen se “BE-ja po i mbështet shqiptarët e Kosovës dhe Pavarësinë”, si argument se...

Flaka Surroi

Flaka Surroi

Muret që i ngremë vetë

Muri ra me të pestin. Krejt u “gëzuan”. Shumë u veturuan. U fotografuan para bagerit – sepse Muri i Berlinit kishte rënë pa ...

038 249 105     info@koha.net    Sheshi Nënë Tereza pn, Prishtinë

Kjo faqe kontrollohet dhe menaxhohet nga KOHA. Të gjitha materialet në të, përfshirë fotografitë, janë të mbrojtura me copyright të KOHA-s dhe për to KOHA mban të drejtat e rezervuara. Materialet në këtë faqe nuk mund të përdoren për qëllime komerciale. Ndalohet kopjimi, riprodhimi, publikimi i paautorizuar qoftë origjinal apo i modifikuar në çfarëdo mënyre, pa lejen paraprake të KOHA-s. Shfrytëzimi i materialeve nga ndonjë faqe interneti a medium tjetër pa lejen e Grupit KOHA, në emër të krejt njësive që e përbëjnë (Koha Ditore, KohaVision, Koha.net, Botimet KOHA, KOHA Print dhe ARTA), është shkelje e drejtave të autorit dhe të pronës intelektuale sipas dispozitave ligjore në fuqi. Të gjithë shkelësit e këtyre të drejtave do të ballafaqohen me ligjin.

ec me kohën...